‘భీమ్లా నాయక్’తో టాలీవుడ్‌కు ఎంట్రీ ఇచ్చిన సంయుక్త మీనన్, ‘బింబిసార’, ‘విరూపాక్ష’లతో స్టార్ హీరోయిన్‌గా ఎదిగింది. తాజాగా ఆమె లేడీ ఓరియెంటెడ్ థ్రిల్లర్‌ సినిమాలో నటిస్తోంది. ‘చింతకాయల రవి’ ఫేమ్ యోగేష్ కేఎంసీ దర్శకత్వంలో తెరకెక్కుతున్న ఈ సినిమాకు ‘ది బ్లాక్ గోల్డ్’ అనే టైటిల్‌ను దీపావళి సందర్భంగా ప్రకటించారు. హాస్య మూవీస్, మాగంటి పిక్చర్స్ సంయుక్తంగా నిర్మిస్తున్న ఈ చిత్రంలో సంయుక్త యాక్షన్‌తో నిండిన డైనమిక్ పాత్రలో కనిపించనుంది. ప్రస్తుతం హైదరాబాద్‌లో షూటింగ్ జోరుగా కొనసాగుతోంది. ఈ బ్యూటీ చేతిలో ప్రస్తుతం ఎనిమిది ప్రాజెక్టులు ఉన్నాయి.
మలయాళ బ్యూటీ సంయుక్త మీనన్ దూకుడు మీదుంది. 2016లో మలయాళ చిత్రమైన ‘పాప్‌కార్న్’ ద్వారా హీరోయిన్‌గా పరిచయమై తన సహజ నటనతో ప్రేక్షకులను ఆకట్టుకుంది. ఆ తరువాత 2018లో తమిళ చిత్రం ‘కలరి’ ద్వారా కోలీవుడ్‌ ఎంట్రీ ఇచ్చింది. తెలుగు ప్రేక్షకులకు ఆమె పరిచయం 2022లో పవన్ కళ్యాణ్ నటించిన ‘భీమ్లా నాయక్’ ద్వారా జరిగింది. అదే ఏడాది విడుదలైన ‘బింబిసార’ సినిమాలో ఆమె నటనకు విశేషమైన ప్రశంసలు లభించాయి. అదే సంవత్సరం ‘గాలిపట 2’ సినిమాతో కన్నడ సినీరంగంలోకి అడుగుపెట్టింది. ఈ విధంగా నాలుగు భాషల్లో తన ప్రతిభను చాటుకున్న సంయుక్త, ఇప్పుడు తెలుగు ప్రేక్షకుల ముందుకు ఓ విభిన్న పాత్రలో రాబోతోంది.
తాజాగా సంయుక్త మీనన్ నటిస్తున్న లేడీ ఓరియెంటెడ్ థ్రిల్లర్‌ సినిమాకు ‘ ది బ్లాక్ గోల్డ్ ’ అనే టైటిల్‌ను దీపావళి సందర్భంగా ప్రకటించారు. ‘చింతకాయల రవి’ ఫేమ్ యోగేష్ కేఎంసీ ఈ సినిమాకు దర్శకత్వం వహిస్తున్నారు. హాస్య మూవీస్, మాగంటి పిక్చర్స్ బ్యానర్లపై రాజేష్ దండా నిర్మిస్తుండగా, సింధు మాగంటి కో-ప్రొడ్యూసర్‌గా వ్యవహరిస్తున్నారు. ఈ ప్రాజెక్ట్‌ సంయుక్త కెరీర్‌లో ప్రత్యేకమైనదిగా భావిస్తున్నారు. పోస్టర్‌ లుక్‌ మరియు టైటిల్‌ రెండూ ప్రేక్షకుల్లో ఆసక్తి రేపుతున్నాయి.ప్రస్తుతం హైదరాబాద్‌లో ఈ సినిమా షూటింగ్ శరవేగంగా కొనసాగుతోంది. థ్రిల్లర్‌ జానర్‌లో కొత్త కాన్సెప్ట్‌ను పరిచయం చేస్తూ, ప్రేక్షకులకు ఉత్కంఠభరితమైన అనుభూతిని ఇవ్వాలని దర్శకుడు యోగేష్ లక్ష్యంగా పెట్టుకున్నట్లు నిర్మాతలు తెలిపారు. ఈ చిత్రంలో సంయుక్త డైనమిక్ పాత్రలో కనిపించనుందని, ఆమె స్వయంగా యాక్షన్ సీక్వెన్స్‌లను చేయబోతున్నారని సమాచారం. యాక్షన్, సస్పెన్స్, ఎమోషన్‌ల మేళవింపుగా ఈ సినిమా రూపుదిద్దుకుంటోందని మేకర్స్ చెబుతున్నారు.
ప్రస్తుతం సంయుక్త మీనన్ లైనప్ చూస్తే ఇతర హీరోయిన్లు కుళ్లుకునే పరిస్థితి కనిపిస్తోంది. ఎందుకంటే ఆమె చేతిలో ఏకంగా 8 సినిమాలున్నాయి. అందులో బాలకృష్ణతో ‘అఖండ 2’, పూరీ జగన్నాథ్ డైరెక్షన్‌లో విజయ్ సేతుపతి నటిస్తున్న మూవీ, శర్వానంద్ జోడిగా ‘నారీ నారీ నడుమ మురారీ’, బెల్లంకొండ శ్రీనివాస్‌తో ‘హైందవ’, నిఖిల్‌తో ‘స్వయంభు’, లారెన్స్‌తో ‘బెంజ్’, హిందీలో ‘మహారాణి’ చిత్రాలు ఉన్నాయి. తన కెరీర్ ప్రారంభం నుంచీ వివిధ భాషల్లో విభిన్న పాత్రలు పోషిస్తూ సత్తా చాటుతున్న సంయుక్త మీనన్, ఇప్పుడు ‘ది బ్లాక్ గోల్డ్’తో మరో సరికొత్త ఛాలెంజ్‌ స్వీకరించింది. థ్రిల్లింగ్ ఎమోషన్లతో నిండిన ఈ సినిమా ఆమె నటనా ప్రయాణంలో మరో మైలురాయిగా నిలిచే అవకాశం ఉంది. ఆ చిత్రానికి ఆమె సమర్పకురాలిగానూ వ్యవహరిస్తుండటం విశేషం. మలయాళం నుంచి ఎంట్రీ ఇచ్చినా తెలుగులో ప్రస్తుతం ఆమె లైనప్ చూస్తుంటే స్టార్ హీరోయిన్‌గా ఎదగడం ఖాయంగా కనిపిస్తోంది.
