వేళాపాల లేకుండా, అనారోగ్యకరమైన ఆహారపు అలవాట్లు అనేక తీవ్రమైన ఆరోగ్య సమస్యలకు దారి తీస్తున్నాయి.. అందువల్ల, ఫిట్‌గా, ఆరోగ్యకరమైన శరీరానికి సమతుల్య ఆహారం చాలా ముఖ్యమైనది. బరువు తగ్గడానికి, మీరు ఎన్నో రకాల ప్రయత్నాలు చేస్తుంటారు. కానీ, ఒక అద్భుతమైన ధాన్యాన్ని మీరు మరచిపోయి ఉండవచ్చు. దీనిని తీసుకోవడం వల్ల మీరు వేగంగా బరువు తగ్గే అవకాశం ఉంటుంది. అదేంటో ఇక్కడ చూద్దాం...
ఎన్నో సమస్యల నుంచి బయటపడేందుకు బార్లీని పురాతన కాలంలో ఎక్కువగా తినేవారట. ఆయుర్వేదంలో వీటిని ఔషదంగా ఉపయోగిస్తారు. సహజ ఆహారం ద్వారా బరువు తగ్గాలనుకునే వారికి బార్లీ ఒక వరం లాంటిది అంటున్నారు పోషకాహార నిపుణులు. ఇది అవసరమైన సూక్ష్మపోషకాలతో కూడిన అధిక ఫైబర్ కలిగిన తృణధాన్యం. బార్లీని శతాబ్దాలుగా పశుగ్రాసంగా, బీరు, కొన్ని స్వేదన పానీయాలకు కిణ్వ ప్రక్రియ మూలంగా ఉపయోగిస్తున్నారు. ఇది సాధారణంగా సూప్‌లు, స్టూలు, బార్లీ బ్రెడ్ వంటి ఆహార పదార్థాలలో ఎక్కువగా ఉపయోగిస్తారు. కానీ, బార్లీ నీరు తాగడం వల్ల బరువు తగ్గడానికి, కడుపు సంబంధిత సమస్యల నుండి ఉపశమనం లభిస్తుందని మీకు తెలుసా..?
బార్లీలో ఉండే విటమిన్లు, ఖనిజాలు మీ శరీరాన్ని ఫ్రీ రాడికల్స్ తో పోరాడటానికి సిద్ధం చేస్తాయి. అలాగే మీ రోగనిరోధక శక్తిని కూడా బలోపేతం చేస్తుంది. బార్లీ నీటిలో విటమిన్ సి ఎక్కువగా ఉన్న నిమ్మకాయ రసాన్ని కలపడం వల్ల ఇది మరింత ప్రభావవంతంగా ఉంటుంది. బార్లీ నీటిని తాగడం వల్ల కొలెస్ట్రాల్ స్థాయిలు సమతుల్యంగా ఉంటాయి. ఈ నీరు మీ శరీరంలో చెడు కొలెస్ట్రాల్ స్థాయిని తగ్గిస్తుంది. మంచి కొలెస్ట్రాల్ ను పెంచుతుంది. దీంతో గుండె సంబంధిత వ్యాధుల ప్రమాదం తగ్గుతుంది.
